မေတ္တာ ၊ စေတနာ နှင့် ပညာအရင်းခံမှသာ အောင်မြင်သောအလုပ်

0

ငယ်ငယ်ကတည်းက ကျန်းမာရေး မကြာခဏဆိုသလို ချူ ချာတတ်တဲ့ ကျွန်မတစ်ယောက် ဆေးရုံသို့ တစ်ခေါက်ရောက်ရပြန်တယ်။ မြန်မာနိုင်ငံအလည်ပြန်တုန်း စားချင်တာတွေ စားချင်တဲ့ဆိုင်တွေမှာ စားခဲ့တဲ့ကျွန်မတစ်ယောက် စင်္ကာပူပြန်လာတဲ့ လေယာဉ်ပေါ်မှာ အန်ပြီးဖျားတာ ရက်သတ္တပတ်တပတ်လုံးလည်းဖျား ၊ မစားမသောက်ချင်လို့ မစားမသောက်နဲ့ ကိုယ်အလေးချိန်လည်း တပတ်အတွင်း  နှစ်ကီလိုလောက်ကျသွားပြီး မသင်္ကာလို့ နီးရာဆေးခန်းကဆရာဝန်ပြတော့ ဆရာဝန်ကစမ်းသပ်စစ်ဆေးပြီး ဆေးရုံတက်ဖို့ ဆေးစာချက်ချင်းရေးပေးပါတယ်။ ဒီလိုနဲ့ စင်္ကာပူဆေးရုံကို ကျွန်မချက်ချင်း ရောက်ခဲ့ပါတယ်။

ပထမတော့ Observation Room မှာ နာရီပိုင်းထား ဆီးစစ် ၊ သွေးစစ်နဲ့ စောင့်ကြည့်ပြီး ကုသမှုအချို့ စတင်ပါတယ်။ ဒါပေမယ့် ဘာရောဂါကြောင့် ကျွန်မဒီလိုဖြစ်နေတယ်ဆိုတဲ့ အဖြေတော့ မသိရသေးပါဘူး။  ဆေးရုံတက်ဖို့ သွေးကြောတွေထဲ အပ်တွေလည်း အဆင်သင့်ထည့်ပြီး ဆေးရုံကပေးတဲ့ ဝတ်စုံလည်း ဝတ်ပြီးအဆင်သင့်နဲ့ပေါ့။ ဒါပေမယ့် အဲဒီနေ့က ကျွန်မကျန်းမာရေး ဘာမှထူးထူးခြားခြားမဆိုးရွားလာဘဲ အဖျားကျဆေးအရှိန်တွေကြောင့် အဖျားလည်း အတော်ကြာကျသွားခဲ့တာမို့ အိမ်ပြန်ခွင့်ရခဲ့တယ်။

နောက်တနေ့မနက်ပိုင်းမှာ ဆေးရုံကကျွန်မကိုဖုန်းဆက်ခေါ်ပြီး ဆေးရုံအမြန်ဆုံးလာတက်ဖို့ပြောပါတယ်။ ကျွန်မရဲ့သွေးထဲမှာ ဘက်တီးရီးယားတွေကို စစ်ဆေးတွေ့ရှိရတာမို့ ဒီဘက်တီးရီးယားတွေ ဘယ်ကလာတယ်ဆိုတာကို အမြန်ဆုံးရှာပြီး ဒီဘက်တီးရီးယားတွေကို သုတ်သင်ရှင်းလင်းရမယ်ပေါ့။ ဒီလိုနဲ့ ကျွန်မဆေးရုံတက်ခဲ့ရတယ်။

ပထမဆုံး ပြင်ပလူနာဌာနမှာ ၂၄နာရီထားပါတယ်။ ကျွန်မကိုထားတဲ့ ပြင်ပလူနာဌာနမှာ ခုတင်၁၀လုံးရှိပါတယ်။ ဒါကလည်း လူနာက တစ်ယောက်တည်းအခန်းယူမလား ၊ အများနဲ့နေမလားဆိုတာကို ရွေးချယ်ရတာပါ။ ကျွန်မက အများနဲ့နေဖို့ ရွေးချယ်ခဲ့တာပါ။ ရောက်တုန်းရောက်ခိုက် စင်္ကာပူဆေးရုံဆိုတာကို စပ်စုချင်သေးတယ်လေ။

Find a new job

ကလေးမွေးတုန်းတခေါက်လောက်ပဲ စင်္ကာပူမှာ ဆေးရုံတက်ဖူးတာဆိုတော့ အခြားရောဂါနဲ့တက်တဲ့အခါ ဘယ်လိုလူနာတွေနဲ့ တွေ့ဆုံရမလဲ ၊ ဘယ်လိုထူးခြားမှုတွေရှိနေမလဲ ၊ မြန်မာနိုင်ငံနဲ့ ဘာတွေ ကွာခြားနေမလဲဆိုတာကို သိချင်ခဲ့တာပါ။ ကျွန်မကိုထားတဲ့ ပြင်ပလူနာဌာနမှာ အငယ်ဆုံးလူနာက ကျွန်မတစ်ယောက်တည်းပါ။ ကျန်တဲ့အရွယ်တွေက အသက်(၅၀)ကျော်ကနေ (၈၀)ကျော်အရွယ်အထိ အမျိုးမျိုးရှိကြပါတယ်။

ကျွန်မရဲ့ ခုတင်ခြေရင်း ဟိုဘက်နံရံမှာ ကျွန်မ အား ၊ ဘား ၊ မား လို့ နာမည်ပေးထားတဲ့ အဖွားတစ်ယောက်ရယ် ၊ ကျွန်မရယ်ပဲ ခုတင်နား လူနာစောင့်မရှိတာ။ ကျန်တဲ့လူနာတွေက ညအိပ်ချိန်ကလွဲရင် အိမ်ကလာပြီး အဖော်လုပ်ကြတယ်။ ည(၈)နာရီကျော်ဆို ပြန်ကြတယ်။ ကျွန်မအမျိုးသားက ကျွန်မသမီးလေးကြည့်နေရလို့ ကျွန်မကို လာမစောင့်နိုင်ဘူး။ သမီးလေးကိုလည်း ဆေးရုံကို ဘာရောဂါမှန်းမသိတဲ့ လူနာတွေကြား မခေါ်လာစေချင်လို့ ကျွန်မအနားမှာ လူနာစောင့်မရှိတာပါ။

အား ဘား မား လို့ ကျွန်မနာမည်ပေးထားတဲ့အဖွားက  ခန့်မှန်းအသက် (၈၀)ကျော်လောက်ရှိမယ်။ မျက်လုံးတွေက အမြဲ ပတ်ဝန်းကျင်ကိုဝေ့ဝိုက်ကြည့်နေပေမယ့် ဘာမှမြင်ရပုံမပေါ်ဘူး။ သူ့ဘာသာသူလည်း မထနိုင်ဘူး။ အသိလည်းကပ်နေတဲ့ပုံမရှိဘူး။ နာရီပိုင်းလောက် ခဏလေး အိပ်ပျော်နေချိန်ကလွဲရင် အမြဲတမ်း အား ဘား မား ဆိုပြီး ယောင် ယောင် အော်နေတတ်တာ။ ဒါကြောင့် အား ဘား မားလို့ နာမည်ပေးထားတာ။ ဒီဝါ့ဒ်ထဲ စရောက်စကတော့ ညပိုင်းမို့ ကိုယ်က အအိပ်လည်းဆတ် ၊ လက်နှစ်ဘက်လုံးမှာ ပိုက်တွေနဲ့သွင်းထားတဲ့ ဆေးရှိန်တွေကြောင့်လည်း အိပ်ချင်နေတတ်တဲ့အချိန်တွေမှာ အဖွားရဲ့ အား ဘား မား အော်သံကြောင့် ခဏ ခဏ လန့်နိုးခဲ့ရတယ်။

စိတ်ဝင်စားစရာကောင်းတာက လူနာစောင့်မရှိတဲ့ အား ဘား မား အဖွားကို ဆရာဝန်တွေ ဂရုစိုက်ကြပုံပါ။ အသိမကပ်တာမို့ ဆန်ပြုတ်လိုအရာကို အဖွားမနက်စာစားတယ်။ ဆန်ပြုတ်ထည့်တဲ့ခွက်ကလည်း ခပ်သေးသေးမို့ နည်းနည်းလေးသာ ပါမှာပါ။ ဒါပေမယ့် အသိမကပ်တဲ့အဖွားကို ဖော်ရွေတဲ့ ဆရာဝန်မလေးနှစ်ယောက်က မနက်စာချော့ပြီးခွံ့နေကြတာကို အံ့အားတသင့်နဲ့ ကြည်နူးဖွယ်မြင်တွေ့ရတာပါ။ အသက်နှစ်ဆယ်စွန်းစွန်းအရွယ် နုနုငယ်ငယ်ဆရာဝန်မလေးနှစ်ယောက်က အဖွားကို တရုတ်လိုနှုတ်ဆက်လိုက် မြှူလိုက် ပြုံးပြလိုက် ထမင်းကျွေးတော့မယ်လို့ပြောပြီး ပါးစပ်ဟဖို့ အာ … အာ နဲ့ ကလေးတစ်ယောက်လို စိတ်ရှည်ရှည် ချော့ကျွေးနေတဲ့ မြင်ကွင်းက ကျွန်မအတွက် ကြည်နူးစရာပါ။

တစ်ဦးက အဖွားကို  အာလို့ ပါးစပ်ဟခိုင်းပြီး တဇွန်းခပ်ကျွေးချိန် ကျန်တစ်ဦးက အဖွားရဲ့ လည်မျို နား နားကြပ်ကပ်ထားတယ်။ ပထမတော့ ဘာကြောင့်မှန်း ကျွန်မနားမလည်ပေမယ့် နားကြပ်ကပ်ထားတဲ့တစ်ယောက်က နောက်တစ်လုတ်ကိုခွံ့ဖို့ပြောမှ ခွံ့တဲ့ဆရာဝန်မက အဖွားကို အာလို့ ပါးစပ်ဟခိုင်းပြီး ခွံ့တယ်။ ခွံ့ပြီးရင် မြန် … မြန် … မြန် လို့ ဝါးဟန်လုပ်ပြီး ဝါးစားမျို ချခိုင်းတဲ့ အမူအရာတွေကို တွေ့တော့မှ ဘာကြောင့် လည်မျို နား နားကြပ်ကပ်နားထောင်သလဲဆိုတာကို ကျွန်မနားလည်ခဲ့တာ။ အဖွား အစာတလုပ်မျိုချပြီးမှ နောက်တစ်လုပ်ကို ခွံ့ခိုင်းဖို့ လည်မျိုနား နားကြပ်ကပ်ထားတာကို နားလည်ခဲ့တာ။

ဒီလိုမှမလုပ်ရင် အသိမရှိတဲ့အဖွား အစာသီးနိုင်တယ်။ အစာတွေ အသက်ရှူလမ်းကြောင်းထဲပိတ်နေရင် ပိုဒုက္ခရောက်နိုင်တယ်။ အဖွားလို လူနာရှင်အနားမှာမရှိ ၊ အသိလည်းမရှိတဲ့ လူနာကို သူတို့လို ဆရာဝန်တွေရဲ့ အသေးစိတ်ကလေးကအစ ဂရုစိုက်မှုအတွက် ကျွန်မကြည်နူးရတာပါ။ စိတ်ထဲကနေ ဒီဆရာဝန်မလေးတွေကို ချီးကျူးမိတယ်။ သူတို့ဟာ အလုပ်သဘောအရ လုပ်နေတာထက် တကယ့်ကို အဖွားအပေါ်ဂရုတစိုက် ပျော်အောင် ၊ စားချင်စိတ်ရှိအောင် ကြင်နာစွာပြုစုနေတာ မြင်ရတဲ့ကျွန်မ ကြည်နူးမိတယ်။ အဲဒီဆေးရုံမှာ Special Nurse ငှါးမလားလို့ ကျွန်မကို လာမေးတဲ့သူမရှိသလို Special Nurse လည်းမထားဘူး။ ဝါ့ဒ်ထဲတာဝန်ကျတဲ့ ဆရာဝန်နဲ့ သူနာပြုတွေကပဲ အလှည့်ကျ ပြုစုလုပ်ကိုင်သွားကြရတာ။

ဒီလိုအခြေအနေမျိုးမှာ ကျွန်မအမေကို သတိရမိတယ်။ မြန်မာနိုင်ငံက ပုဂ္ဂလိက ဆေးရုံတစ်ခုမှာ အစာအဆိပ်သင့်ပြီး ဝမ်းလျှောလို့ ဆေးရုံတက်ခဲ့ရတဲ့ ကျွန်မအမေဟာ ဆေးရုံတက်စက အကောင်းကြီး လမ်းလျှောက်နိုင် ၊ အသိရှိရှိနဲ့ စားနိုင် ၊ သောက်နိုင် ၊ စကားတွေပြောနိုင်ပါရက်နဲ့ လူနာရှင်ဖြစ်တဲ့ သားသမီးတွေ နိုင်ငံရပ်ခြားရောက်နေလို့ အနားမှာ လူနာစောင့်မရှိတဲ့အမေ့ကို Special Nurse နေ့ညငှါးခိုင်းတယ်။

ဒီလိုနဲ့ အမေဟာ ဆေးရုံပေါ် ဝမ်းဆက်လျှောရာက ရက်ပိုင်းအတွင်း သတိလစ်သွားတယ်။ ဆေးရုံမှာ ငွေကြိုသွင်းထားတာမို့ ၊ အမျိုးတွေကိုလည်း စိတ်မပူနဲ့ ပြန်ကောင်းလာမယ်ပြောတာမို့ အမျိုးတွေက ကျွန်မတို့သားသမီးတွေ အဝေးကစိတ်ပူမှာစိုးလို့ သတိလစ်နေတာကို ပြန်မပြောဘူး။ နှစ်ပတ်လောက်နေလို့ သတိပြန်မလည်လာဘဲ တကိုယ်လုံး ဖောရောင်နေတော့မှ ကျွန်မတို့ကို အမျိုးက အသိလှမ်းပေးခဲ့တာ အခြေအနေမကောင်းဘူးတဲ့။

အမျိုးတွေကိုမေးတော့ ဘာရောဂါမှန်းမသိသလို ၊ ဆရာဝန်တွေကလည်း မပြောဘူး ၊ Special Nurse တွေကလည်း မသိဘူးလို့ပြောတယ်တဲ့။ ကျွန်မလေယာဉ်လက်မှတ်ချက်ချင်းစီစဉ်ပြီး အမေ့ဆီလိုက်တော့ အသိမရှိတဲ့ အမေ့နားမှာ ဝတ္ထုဖတ်နေတဲ့ Special Nurse ကိုတွေ့ခဲ့တယ်။ အမေ့ရောဂါအကြောင်း မေးတော့ တုန်တုန်လှုပ်လှုပ်နဲ့ ဘာမှမရှင်းပြနိုင်ဘူး။ ဘာတွေ on ထားသလဲဆိုတာလဲ မပြောနိုင်ဘူး။ တနေ့ထက်တနေ့ တိုးတက်လား ၊ ဆိုးရွားလာလားဆိုတာလည်း မသိဘူး။ ဝါ့ဒ်ကနာ့စ်နဲ့ ဆရာဝန်တွေကိုမေးတော့လည်း ကျွန်မနားမလည်တဲ့ ဆေးပညာမို့လို့ မရှင်းပြနိုင်ဘူးဆိုတော့ ကျွန်မထသောင်းကျန်းမှ အမေ့တာဝန်ယူတဲ့ ဆရာဝန်ကြီးဆိုတာကို အရေးတကြီး ဖုန်းခေါ်ပေးတယ်။

နာရီပိုင်းအတွင်း ဆရာဝန်ကြီးကိုယ်တိုင် ကျွန်မတို့ကို လာတွေ့မှ အမေဟာ ဝမ်းလျှောရင်း ကျောက်ကပ်ထိသွားတာဖြစ်ကြောင်း ၊ အချိန်မီကျောက်ကပ်မဆေးရင် အသက်မမီနိုင်ကြောင်းနဲ့ အခုတောင်မှ အသက်မီလိမ့်မယ်လို့ မသေချာကြောင်းဆိုတာတွေ သိခွင့်ရခဲ့တာပါ။ အိမ်နဲ့ နီးနီးနားနား အမေတက်တဲ့ မဟာမြိုင်ဆေးရုံမှာ ကျောက်ကပ်ဆေးတဲ့စက်မရှိဘူး။ ကိုယ့်ဆေးရုံမှာမရှိတဲ့စက်နဲ့ လူနာကုသမှုလိုတယ်ဆိုတာကို လူနာနဲ့ လူနာရှင်တွေ (ကျွန်မတို့အမျိုးတွေ)ကို အသိမပေးဘဲ ပိုက်ဆံကို ရသလောက် လူနာဆီက ညာယူရင်းဒီလောက်ထိ လူနာအခြေအနေဆိုးသွားခဲ့တာကို အဲဒီဝါ့ဒ်က ဆရာဝန်က သူကြည့်ခ သုံးသောင်းလျှော့ပေးတာကလွဲရင် ဘာမှ တာဝန်ယူတာမျိုး ၊ တောင်းပန်တာမျိုး ၊ မျက်နှာချင်းဆိုင်တာမျိုးတွေ မလုပ်ခဲ့ပါဘူး။

ကျွန်မဆိုလိုတာက တာဝန်ယူမှုနဲ့ တာဝန်ခံမှုအပိုင်းတွေကို နှိုင်းယှဉ်ပြချင်တာ။ တာဝန်ယူတဲ့နေရာဟာ လူနာစောင့်မရှိလည်း တာဝန်သိပြီး တာဝန်ယူတယ်။ တာဝန်မယူတတ်သူတွေက သူတို့ကြောင့် မှားယွင်းသွားပစေဦး ဘာမှတာဝန်ယူမှု မရှိပါဘူး။ ပြောင်းလဲသင့်ပြီဆိုတဲ့အထဲမှာ စိတ်ဓါတ်တွေ အဓိက ပြောင်းလဲပစ်ရမယ်ဆိုရင်မှားမလား။ တာဝန်ယူမှုနဲ့ တာဝန်ခံမှုတွေ ၊ တာဝန်သိတတ်မှုဆိုတဲ့ စိတ်ဓါတ်တွေဆီရောက်ဖို့ ပြောင်းလဲပစ်ရမယ်ဆိုလည်း တာဝန်မယူတတ်သူတွေရှိနေသမျှ တာဝန်မဲ့မှုတွေ ရှိနေမှာပဲ။

ကံကောင်းထောက်မစွာ အဲဒီဆေးရုံကငွေပေးဆင်းခဲ့ပြီး ဆေးရုံပြောင်းကုသခဲ့တဲ့ အမေ သေကံမရောက်အသက်မပျောက်ခဲ့ပါဘူး။ အမေအသက်မရှင်ခဲ့ရင်တောင် အဲဒီဆေးရုံနဲ့ အဲဒီဆရာဝန်တွေကို တရားစွဲဖို့ ကျွန်မမှာ အစီအစဉ်မရှိပါဘူး။ တာဝန်မဲ့သူတွေ များနေတဲ့အရပ်မှာ ဘယ်လောက်ပဲမှန်နေပစေ အချိန်နဲ့ငွေတွေ ရင်းနှီးပြီး အမှန်တရားကို ဘဲဥအစရှာသလို လိုက်ရှာနေရဦးမှာမို့ ဒီလူတွေနဲ့ လုံးဝမျက်နှာချင်းမဆိုင်ချင်တာ ၊ မပတ်သက်ချင်တာ ၊ ခပ်ကင်းကင်း နေလိုက်ချင်တဲ့စိတ်တွေကြောင့်ပဲ ဘာမှ အရှည် အရှည် မလုပ်ဖြစ်တော့ဘူး။

တိုးတက်တဲ့နိုင်ငံနဲ့ မတိုးတက်တဲ့နိုင်ငံ ဘာတွေကွာနေသလဲဆို ခံယူချက်တွေနဲ့ လုပ်ရပ်တွေ ၊ စိတ်နေစိတ်ထားတွေ၊ တာဝန်ခံလုပ်ကိုင်မှုတွေ ကွာနေတာပါ။ ဆရာဝန်ဆိုတဲ့အလုပ်မှာ သင်ယူထားတဲ့ပညာတွေအပြင် လူနာအပေါ်ထားတဲ့ မေတ္တာ ၊ လူနာကို အသက်သာဆုံးဖြစ်စေချင်တဲ့ စေတနာတွေမရှိဘဲ လူနာနဲ့ လူနာရှင်တွေ စိတ်ချမ်းသာအောင် ကုသမှုတွေ မပေးနိုင်ဘူးဆိုတာ ကျွန်မလက်တွေ့ သိခဲ့ရပြီလေ။ လူနာနဲ့လူနာရှင်တိုင်းဟာ တာဝန်ခံပြီး တာဝန်ယူတတ်တဲ့ဆရာဝန် ၊ ပညာသာမက မေတ္တာနဲ့ စေတနာပါစွက်ပြီး ကုသပေးနေတဲ့ ဆရာဝန်ကောင်း ၊ ဆေးဝန်ထမ်းကောင်းတွေနဲ့ မြန်မာနိုင်ငံမှာ တွေ့ဆုံကြပါစေလို့ ဆုတောင်းရုံမှတပါး အခြားမတတ်နိုင်ပြီလေ။

ရတု (Burmesehearts.com)

Find a new job

You might also like More from author

Leave a comment