မိခင်လောင်းတို့ ….. စာဖတ်ခြင်းဖြင့် စိတ်ဖိစီးမှုတွေ လျော့ချစို့

ကိုယ်ဝန်ဆောင်မိခင်များဟာ ကိုယ်ဝန်လရင့်လာသည်နှင့်အမျှ ထိုင်ခက် ၊ ထခက် ၊ သွားလာရ ခက်ခဲသည့် အခြေအနေများကြောင့် ၎င်းတို့၏ အချိန်အများစုဟာ အားလပ်ချိန်များလို ဖြစ်နေတတ်ပါတယ်။
ဒီလိုအားလပ်ချိန်တွေကို အကျိုးရှိအောင် ဘယ်လိုအသုံးချမလဲ ။ တချို့ကိုယ်ဝန်ဆောင်သည်တွေက ရုပ်ရှင်ကြည့်ရင်း အချိန်သုံးတယ်။ တချို့ကကျတော့ သိုးမွှေးထိုးရင်း အချိန်သုံးတယ်။ သူတို့အချိန်သုံးပုံအမျိုးမျိုး ရှိကြတဲ့အနက် စာဖတ်ခြင်းနဲ့ မိမိတို့ အားလပ်ချိန်များကို အသုံးပြုကြဖို့ ကျွန်မက တိုက်တွန်းချင်ပါတယ်။

စာဖတ်ခြင်း အလေ့အထဟာ အင်မတန်ကောင်းတဲ့ အလေ့အထပါ ။ စာဖတ်ခြင်း ဝါသနာပါတဲ့သူတွေဟာ အထီးကျန်မှာ မကြောက်ကြဘူး ။ ဘာဖြစ်လို့လဲဆို စာကို စိတ်ဝင်စားစွာဖတ်ဖို့ လူနှစ်ယောက်မှ မလိုဘဲလေ။ ဒါ့အပြင် စာဖတ်ခြင်းဆိုတာ ကိုယ်ရည်ကိုယ်သွေး တိုးတက်အောင် လုပ်နည်းတစ်မျိုးပါ။ အရည်အချင်းဆိုတာ သွေးတတ်ရင် သွေးတတ်သလို ထက်မြက်သထက် ထက်မြက်လာတာမျိုး မဟုတ်လား။ တုံးမသွားအောင်လည်း ပုံမှန်သွေးပေးဖို့လိုပါတယ်။

စာဖတ်တယ်လို့ ဆိုတဲ့အခါမှာလည်း ဘယ်လိုစာမျိုးကိုဖတ်မလဲ ။ လွယ်လွယ်ပြောရရင် ကိုယ်လိုတဲ့စာမျိုးကို ဖတ်လို့ပဲ ပြောရမှာပါ။ အချဉ်ကြိုက်တဲ့သူက ကိုယ်စားတဲ့အစာထဲ အချဉ်ကဲထားသလို ကိုယ်ကြိုက်တဲ့ စာမျိုးကိုဖတ်ပြီး စာဖတ်ကျင့် အရင်လုပ်ယူရမှာပါ။ စာဖတ်ကျင့်ဆွဲသွားတော့မှ အခြားသုတစာပေတွေ ၊ မိမိအတွက် အကျိုးရှိစေမယ့် စာပေတွေကို ရွေးဖတ်ကျင့်ရအောင် လုပ်ရမှာပဲ။

ကျွန်မကတော့ စာဖတ်တာ ဝါသနာပါတဲ့သူမို့ ကလေးယူမယ်လို့ ဆုံးဖြတ်လိုက်ကတည်းက ကလေးအဆင့်ဆင့် ကြီးထွားပုံ ၊ ကလေးအာဟာရ ၊ ကလေးတစ်ယောက်ရဲ့ စိတ်ကူးနဲ့ခံစားမှု ၊ မေတ္တာတရားဟာ ဘာကြောင့် ကလေးအတွက် လိုအပ်တယ် ၊ ကလေးဘာသာ အိမ်သာကိုယ်တိုင် သွားတတ်အောင် သင်ပေးနည်း စသဖြင့်သော စာအုပ်တွေ ဝယ်လို့သော်လည်းကောင်း ၊ ကြုံကြိုက်လျှင်သော်လည်းကောင်း ၊ အွန်လိုင်းကနေသော်လည်းကောင်း အခါအခွင့်သင့်လျှင် သင့်သလို ဝယ်ထား ၊ ဖတ်မှတ်နေတော့တာပဲ ။

စာအုပ်ထဲမှာ စကားလုံးတွေ အများကြီးရှိတယ် ။ ကိုယ်မသိတာတွေကို သိတဲ့သူတွေက ရေးထားတယ် ။ သူတို့အတွေ့အကြုံ ၊ သူတို့အမြင်တွေကို ကိုယ့်ကိုယ်ပိုင်အသိဥာဏ်နဲ့ ပိုင်ခြားဆန်းစစ်ပြီး အသုံးပြုရင် အများကြီး အကျိုးရှိပါတယ်။

ရတု (Burmesehearts.com)