class="post-thumbnail open-lightbox" href>
ကိုယ့်အိုးနှင့်ကိုယ့်ဆန် တန်အောင် စဉ်းစားပါလေ
ပြည့်စုံချမ်းသာသော မတောင့်မတ မိသားစုများမှလွဲ၍ အိမ်ထောင်တစ်ခုတွင် ကျွေးမွေးနိုင်သော လူအရေအတွက်မှာ အကန့်အသတ်နှင့် ဖြစ်ပေရာ မိသားစုဝင်ငွေနှင့် မိသားစုဦးရေ ၊ ၎င်းတို့၏ နေထိုင်စားသောက်ရေး ၊ ပညာရေး ၊ ကျန်းမာရေး အစရှိသည်တို့ကို ကြိုတင်တွက်ချက်၍ ဖူလှုံသည်ဟု ယုံကြည်မှုရှိပါမှ သားသမီးဦးရေ မည်မျှယူမည်ကို စဉ်းစားချင့်ချိန်ပြီး ယူသင့်သည်။
မိမိက ဖူလှုံသည်ဟု ယုံကြည်သည့်တိုင် အလုပ်အဆင်မပြေ၍ သော်လည်းကောင်း ၊ ရန်သူမျိုးငါးပါးကြောင့်သော်လည်းကောင်း အခြားအကြောင်းကြောင်းကြောင့် မိသားစုဝင်ငွေနှင့် စုဆောင်းငွေများ လျော့ကျသွားနိုင်သေးသည်။ သားသမီးယူပြီးမှ ဝင်ငွေနှင့် ထွက်ငွေ မမျှတ ၊ မလောက်ငခြင်းသည် သားသမီးများ အပြစ်မဟုတ် ။ မိဘများ၏ ပေါ့လျော့မှု အပြစ်သာဖြစ်သည်။
မိဘတွေခေါ်သွင်းလာလို့ လူ့လောကထဲရောက်လာသည့် သားသမီး၏ နေထိုင်စားသောက်ရေး ၊ ပညာရေး ၊ ကျန်းမာရေး ၊ ဗာဟီရကိစ္စရပ်များသည် မိဘနှစ်ဦးတာဝန်သာဖြစ်သည်။
သားသမီးမယူခင်က ကြိုတင်မစဉ်းစားခဲ့ဘဲ အရွယ်မရောက်သေးသည့် သားသမီးများကို အိမ်မိသားစုတာဝန်များ မျှထမ်းခိုင်းခြင်းသည် မတရားမှုသက်သက်သာ ဖြစ်သည်။
ပြည့်စုံချမ်းသာသော မိဘများမှ မွေးဖွားလာသည့်တိုင် မိမိမွေးထားသော သားသမီးများအား ငယ်စဉ်ကတည်းက ရင်အုပ်မကွာ ထိန်းသိမ်းကြပ်မတ်မှု ၊ လိမ္မာနားလည်အောင် သွန်သင်ဆုံးမခြင်းမျိုးမရှိဘဲ မသိတတ် ၊ မလိမ္မာသည့် သားသမီးတွေအဖြစ် ကြီးပြင်းလာမှ သားသမီးဆိုးရထားသည်ဟု ဆိုတတ်ကြသည်။
သားသမီးများ ဆိုးရခြင်းသည် ဤသားသမီးများကို နားလည်အောင် နည်းမှန်လမ်းမှန် ဆိုဆုံးမမှုမပြုခဲ့သော ၊ သားသမီးအတွက် အချိန်မပေးခဲ့သော မိဘများ၏ အပြစ်ဖြစ်သည်။
ရရှိထားသော သားသမီးများ ဆိုးသွမ်းနေပါက မြွေပွေး ခါးပိုက် ပိုက်ထားသကဲ့သို့ဖြစ်မည် ။ သားသမီးများကို သွန်သင်ဆုံးမဖို့ အချိန်မပေးနိုင်ဘဲ တသက်လုံးရှာထားသမျှ စည်းစိမ်ဥစ္စာများသည် (မိမိ အရင်လို မရှာဖွေနိုင်တော့သည့်အချိန်ကျမှ) ထိုသားသမီးများကြောင့် ကုန်သွားနိုင်သည်။ ထိုအခါ အိုမှဒုက္ခရောက်သည့် မိမိအား မည်သူက လာရောက်ကြည့်ရှု စောင့်ရှောက်မည်နည်း။
ထိုကဲ့သို့သော အသက်ကြီးမှ အထီးကျန် ၊ ဒုက္ခရောက်သည့် အဖြစ်များသည် တိုးတက်သည်ဆိုသည့် နိုင်ငံများ ၊ ချမ်းသာသည်ဆိုသော အသိုင်းအဝန်းများတွင် ဖြစ်ပွားလျက်ရှိနေသည်။
ထို့ကြောင့် သိတတ်နားလည်လိမ္မာသည့် သားသမီးလိမ္မာများ ရလိုသည်ဆိုပါက ၎င်းတို့ငယ်စဉ်ကတည်းက ၎င်းတို့အား ထောက်ပံ့ခြင်း ၊ မိသားစုတွင်း ပျော်ရွှင်စွာ ကြီးပြင်းစေခြင်း ၊ နည်းမှန်လမ်းမှန် ဆုံးမသွန်သင်ပေးခြင်း ၊ ၎င်းတို့အပေါ် နားလည်မှုပေးခြင်းတို့ဖြင့်သာ သားသမီးလိမ္မာများကို ရရှိပေမည်။
ရတု (Burmesehearts.com)